नवलपुर। नारायणी नदीमा जलसतह बढेसँगै नवलपरासी (बर्दघाट–सुस्तापूर्व)का विभिन्न बस्ती डुबानमा परेका छन् ।
गैँडाकोट नगरपालिका–२ स्थित बोटेटोल तथा कावासोती नगरपालिकाको अमलटारी क्षेत्र पनि डुबानमा परेको छ । नारायणी नदीको जलसतह बढ्दै गएपछि नदी आसपासका बस्तीमा पानी पसेको हो ।
जिल्ला प्रहरी कार्यालय नवलपरासी (बर्दघाट–सुस्तापूर्व)का सूचना अधिकारी प्रहरी निरीक्षक अनिल पण्डितका अनुसार बोटेटोल डुबानमा परेपछि त्यहाँका स्थानीय बासिन्दालाई सुरक्षित स्थानमा स्थानान्तरण गरिएको छ ।
नदीमा पानीको बहाव निरन्तर बढिरहेकाले नदी आसपासका अन्य बस्तीमा समेत जोखिम बढेको प्रहरीले जनाएको छ । प्रहरीले स्थानीयवासीलाई सतर्क रहन तथा जोखिमयुक्त क्षेत्रमा नजान आग्रह गरेको छ ।
बाढी प्रभावित क्षेत्रमा सुरक्षा निकाय परिचालन गरी अवस्था निगरानी भइरहेको प्रहरीले जनाएको छ ।
