काठमाडौं । नेपाल चार्टर्ड एकाउन्टेन्ट्स संस्था र द इन्स्टिच्युट अफ चार्टर्ड एकाउन्टेन्ट्स अफ इन्डियाबीच पारस्परिक मान्यता सम्झौता नवीकरण तथा विस्तार भएको छ ।
नयाँ दिल्लीस्थित आइसिएआई भवन, इन्द्रप्रस्थ मार्गमा आयोजित एक विशेष समारोहमा २९ सेप्टेम्बर २०२६ मा उक्त सम्झौतामा हस्ताक्षर भएको हो । यो सम्झौता आगामी ५ वर्ष अर्थात् २० अक्टोबर २०३० सम्मका लागि विस्तार गरिएको छ ।
सम्झौता पत्रमा आइक्यानका अध्यक्ष सिए आनन्दराज शर्मा वाग्ले र आइसिएआईका अध्यक्ष सिए प्रसन्न कुमार डी. ले हस्ताक्षर गरेका छन् ।
हस्ताक्षर समारोहमा आइक्यानका उपाध्यक्ष सिए हेमकुमार काफ्ले, आइसिएआईका उपाध्यक्ष सिए मंगेश किनारे, आइक्यानका कार्यकारी निर्देशक सिए विमल डङ्गोल, आइसिएआई काउन्सिलका सदस्यहरू तथा दुवै संस्थाका पदाधिकारीहरूको उपस्थिति रहेको थियो ।
सम्झौताअनुसार दुवैमध्ये कुनै पनि संस्थाबाट योग्यता हासिल गरेका चार्टर्ड एकाउन्टेन्टहरूले अर्को संस्थाको तोकिएको परीक्षा उत्तीर्ण गरी पूर्व योग्यताको आधारमा सदस्यता प्राप्त गर्न सक्नेछन्। यो व्यवस्था आफ्नै संस्थाको नियमित शिक्षा र तालिमको माध्यमबाट उत्तीर्ण भई असल स्थितिमा रहेका सदस्यहरूका लागि मात्र लागू हुनेछ ।
यसका साथै सम्झौताले आर्टिकल्सिप तालिमको मान्यता प्रदान गर्ने व्यवस्था समेत गरेको छ । यद्यपि, अर्को संस्थामा आबद्ध हुने सदस्यहरूको व्यावसायिक अभ्यास गर्ने अधिकार भने सम्बन्धित देशको प्रचलित कानुन तथा नियमावली अनुसार निर्देशित हुनेछ ।
सम्झौता हस्ताक्षर हुनुअघि आइक्यानका पदाधिकारीहरूका लागि दुई दिने एक्सपोजर तथा तालिम कार्यक्रम आयोजना गरिएको थियो ।
आइसिएआईका पदाधिकारीहरूले सञ्चालन गरेको सो सत्रमा सिए शिक्षाका नवीन प्रवृत्ति, निरन्तर व्यावसायिक शिक्षा, डिजिटल रूपान्तरण र आर्टिफिसियल इन्टेलिजेन्स, परीक्षा व्यवस्थापन तथा नियामक विषयहरूमा अनुभव आदानप्रदान गरिएको थियो ।
यस कार्यक्रमले दुवै संस्थालाई आफ्ना प्रणाली, प्रक्रिया र अभ्यासका अनुभव साटासाट गर्न तथा भावी सहकार्यका सम्भावित क्षेत्रहरू पहिचान गर्न सहयोग पुर्याएको छ ।
आइक्यान र आइसिएआईबीचको एमआरएको विस्तारलाई दुवै संस्थाबीचको सम्बन्धमा अर्को महत्त्वपूर्ण कोसेढुङ्गाको रूपमा लिइएको छ । यसले नेपाल र भारतका चार्टर्ड एकाउन्टेन्टहरूका लागि व्यावसायिक गतिशीलताको निरन्तर अवसर खुला गर्नेछ ।
