काठमाडौं । ज्योति विकास बैंक लिमिटेडले आर्थिक वर्ष (आव) २०८२-८३ को चौथो त्रैमाससम्म आइपुग्दा आफ्नो नाफा र अन्य प्रमुख वित्तीय सूचकहरूमा उत्साहजनक सुधार गरेको छ ।
विगत तीन वर्षका वार्षिक तथा त्रैमासिक प्रतिवेदनहरूको तुलनात्मक अध्ययन गर्दा बैंकले निक्षेप संकलन, ऋण प्रवाह र जोखिम व्यवस्थापनमा सुधार गरेको देखिन्छ ।
आर्थिक वर्ष २०८०/८१ मा बैंकले १७ करोड ५ लाख रुपैयाँ खुद नाफा आर्जन गरेको थियो, जुन आव २०८१-८२ मा घटेर १० करोड रुपैयाँ मा सीमित भएको थियो ।
तर, आव २०८२-८३ को असार मसान्तसम्मको अपरिष्कृत वित्तीय विवरण अनुसार बैंकले १ अर्ब ९५ लाख रुपैयाँ बढी खुद नाफा कमाउँदै ऐतिहासिक सफलता प्राप्त गरेको छ ।
बैंकको निक्षेप संकलन र कर्जा प्रवाहमा पनि उतारचढाव सहित केही सुधार देखिएको छ ।
आव २०८०-८१ मा ६७ अर्ब ५५ करोड रुपैयाँ निक्षेप रहेकोमा आव २०८१-८२ मा केही घटेर ६१ अर्ब ८३ करोड रुपैयाँ पुगेको थियो । हाल आव २०८२-८३ को अन्त्यसम्म बैंकले पुनः ६७ अर्ब २२ करोड रुपैयाँ निक्षेप संकलन गर्न सफल भएको छ ।
कर्जा प्रवाहतर्फ आव २०८०-८१ मा ५३ अर्ब ७५ करोड रुपैयाँ रहेकोमा आव २०८१-८२ मा ५१ अर्ब १३ करोड रुपैयाँ कायम भएको थियो । पछिल्लो विवरण अनुसार बैंकले हाल ५३ अर्ब ५ करोड रुपैयाँ कर्जा प्रवाह गरेको छ ।
बैंकको निष्क्रिय कर्जामा विगतमा केही दबाब देखिए पनि हाल यसमा सुधार आउन थालेको छ । आव २०८०-८१ मा ५.२९ प्रतिशत रहेको निष्क्रिय कर्जा आव २०८१-८२ मा बढेर ७.७५ प्रतिशत पुगेको थियो । तर, आव २०८२-८३ को चौथो त्रैमाससम्म आइपुग्दा यसलाई घटाएर ६.५५ प्रतिशतमा झारेको छ ।
यस्तै, निष्क्रिय कर्जाका विरुद्ध गरिएको प्रोभिजनिङ व्यवस्था पनि मजबुत देखिएको छ । आव २०८१-८२ मा ९९.६९ प्रतिशत रहेको यो प्रावधान हाल बढेर १०१.९३ प्रतिशत पुगेको छ । जुन गत आर्थिक वर्षको अन्त्यसम्म ९९.६९ प्रतिशत रहेको थियो ।
बैंकको पूँजी पर्याप्तता अनुपात मा क्रमिक सुधार भएको छ । आव २०८०-८१ मा १२.३९ प्रतिशत रहेको यो अनुपात आव २०८१-८२ मा १३.८४ प्रतिशत र हाल आव २०८२-८३ मा १४.०५ प्रतिशत पुगेको छ । यो नियामक निकायले तोकेको सीमा भन्दा माथि, सहज अवस्थामा छ ।
त्यसैगरी, बैंकको कोषको लागतमा पनि उल्लेख्य गिरावट आएको तथ्यांकले देखाएको छ । आव २०८१-८२ मा ४.९९ प्रतिशत रहेको कोषको लागत हाल घटेर ३.७६ प्रतिशतमा झरेको छ ।
कोषको लागत घट्नुले बैंकको आधार दर घटाउन र प्रतिस्पर्धात्मक क्षमता बढाउन सहयोग पुर्याएको देखिन्छ ।
