काठमाडौं । वाणिज्य बैंकहरूले आगामी २०८३ वैशाख महिनाका लागि नयाँ ब्याजदर सार्वजनिक गरेका छन् । प्राप्त तथ्यांक अनुसार चैत महिनाको तुलनामा वैशाखमा व्यक्तिगत निक्षेपतर्फको औसत ब्याजदरमा केही गिरावट आएको छ भने संस्थागततर्फ सामान्य वृद्धि देखिएको छ ।
बैंकहरूले सार्वजनिक गरेको तथ्यांक अनुसार चैत महिनामा वाणिज्य बैंकहरूमा व्यक्तिगत मुद्दती निक्षेपतर्फको औसत ब्याजदर ४.४९ प्रतिशत रहेको वैशाख महिनाका लागि झिनो अंकले घटेर ४.४१ प्रतिशत कायम भएको छ । यो चैत महिनाको तुलनामा ०.०८ प्रतिशत विन्दुले कम हो ।
वैशाखमा सबैभन्दा बढी ब्याजदर दिने बैंकहरूमा एनएमबि बैंक र राष्ट्रिय वाणिज्य बैंक रहेका छन्, जसले व्यक्तिगततर्फ ५ प्रतिशत ब्याजदर कायम गरेका छन् । सबैभन्दा कम ब्याजदर सिद्धार्थ बैंकको ४ प्रतिशत रहेको छ ।
चैत महिनाको तुलनामा वैशाख महिनामा संस्थागत निक्षेपतर्फ भने औसत ब्याजदरमा सामान्य वृद्धि हुने भएको छ । चैतमा ३.२९ प्रतिशत रहेको संस्थागत औसत ब्याजदर वैशाखमा ३.३३ प्रतिशत पुगेको छ । तथ्यांक अनुसार संस्थागततर्फ समग्रमा ०.०६ प्रतिशतको अन्तर देखिएको हो ।
ब्याजदर घटाउने र बढाउने बैंकहरू
वैशाख महिनाका लागि ६ वटा बैंकले व्यक्तिगत तर्फको ब्याजदर घटाएका छन् भने एउटा बैंकले बढाएको छ । ब्याजदर घटाउने बैंकहरूमा हिमालयन बैंक (०.५०%), सिटिजन्स बैंक (०.३५%), सिद्धार्थ बैंक र एनआईसी एसिया (०.२५%), एभरेष्ट बैंक (०.२०%) र स्ट्याण्डर्ड चार्टर्ड (०.०१%) रहेका छन् । कृषि विकास बैंकले भने व्यक्तिगततर्फ ०.०४ प्रतिशत र संस्थागततर्फ ०.०३ प्रतिशतले ब्याजदर बढाएको छ ।
नेपाल बैंक, नेपाल एसबीआई, लक्ष्मी सनराइज, ग्लोबल आईएमई, प्राइम, प्रभु, माछापुच्छ्रे, एनएमबि, सानिमा, राष्ट्रिय वाणिज्य र एनआईएमबिले भने वैशाख महिनाका लागि आफ्नो ब्याजदर स्थिर राखेका छन् ।
