काठमाडौं । फर्स्ट माइक्रोफाइनान्स लघुवित्त वित्तीय संस्थाको १ लाख ८६ हजार बढी कित्ता शेयर आजबाट बिक्रीमा राखिएको छ।
संस्थाको संस्थापक समूहको १ लाख ८६ हजार ४३३ कित्ता शेयर लिलामी प्रक्रियामार्फत बिक्रीमा राखिएको हो। यो शेयरमा योग्य इच्छुक जोकोही व्यक्ति तथा संस्थाले खरिदका लागि बोलपत्र पेस गर्न सक्नेछन्।
बिक्रीमा राखिएको शेयरको न्यूनतम मूल्य प्रतिकित्ता २८० रुपैयाँ तोकिएको छ। यसको अर्थ बोलपत्र पेस गर्दा न्यूनतम मूल्य वा सोभन्दा बढी बोलकबोल गर्नुपर्नेछ।
बोलपत्र पेस गर्दा न्यूनतम १ लाख कित्ता शेयर खरिदका लागि आवेदन दिनुपर्नेछ। अधिकतममा भने सम्पूर्ण कित्ता खरिदका लागि आवेदन दिन सकिनेछ।
बोलपत्र काठमाडौंको नारायणचौरस्थित मुक्तिनाथ क्यापिटलमा पेस गर्न सकिनेछ। बोलपत्र आउँदो चैत १० गतेभित्र पेस गर्नुपर्नेछ।
