काठमाडौं। खानेपानीमन्त्री प्रदीप यादवले गुणस्तरीय र सुरक्षित खानेपानी उपलब्ध गराउन दीर्घकालीन समाधान खोज्ने काम भइरहेको बताएका छन्।खानेपानी मन्त्रालय, खानेपानी तथा ढल व्यवस्थापन विभाग, राष्ट्रिय खानेपानी एवं सरसफाइ उपभोक्ता महासंङ (फेडवास)द्वारा संयुक्त रुपमा आयोजना गरिएको ‘खानेपानी तथा सरसफाइ पैरवी राष्ट्रिय शिखर सम्मेलन’मा उनले सरकारले सीमित स्रोतसाधनको अधिकतम उपयोग गर्दै नागरिकलाई गुणस्तरीय खानेपानी उपलब्ध गराउने प्रयास गरिरहेको जानकारी दिए।
उनले भने, ‘खानेपानी तथा ढल व्यवस्थापन विभागको तथ्यांकअनुसार करिब २७ प्रतिशत नेपालीले मात्र सुरक्षित खानेपानीको पहुँच पाएका छन्। यसको मतलब अहिले पनि करिब ७३ प्रतिशत नेपाली नागरिकलाई स्वच्छ खानेपानीको पहुँच सुनिश्चित गर्न बाँकी छ। यसलाई सोह्रौँ योजनाको अन्त्यसम्ममा ४५ प्रतिशत पु¥याउनका लागि ठोस नीति, पर्याप्त बजेट, र दिगो योजना आवश्यक छ।’
खानेपानी मन्त्रालयका सचिव प्रमिलादेवी शाक्य वज्राचार्यले खानेपानी तथा सरसफाइ क्षेत्रले जलवायु परिवर्तन, सीमित बजेट र जनसंख्या वृद्धिजस्ता चुनौती सामना गरिरहेको बताए।
